Ecommerce პროექტის ეფექტიანობის შესაფასებლად ხშირად შემოსავლის მოცულობას და მის ზრდას აკვირდებიან, იმედია ხშირად გესმით ფრაზა “თვის გეგმა შესრულებულიაა!”, თუმცა თვის ბოლოს მხოლოდ ამ ფრაზის გამოძახილი არ განსაზღვრავს თქვენი პროექტის ეფექტიანობას. ანალიტიკის ის ინსტრუმენტები რომელზეც ვისაუბრებთ — ბიზნესს საშუალებას აძლევს გაიგოს, რამდენად ეფექტური იყო სარეკლამო კამპანიები და გამოგვადგება თუ არა მსგავსი მოდელი განვითარებისთვის. ამ სტატიაში გაგაცნობთ ელექტრონული კომერციის პროექტების ეფექტიანობის შეფასების 10 უმნიშვნელოვანეს მაჩვენებელს: გავიგებთ როგორ იზომება თითოეული მათგანი და რა სარგებლის მიღებაა შესაძლებელი გრძელ ვადიან პერიოდში.
რა განსხვავებაა ბიზნესის მაჩვენებლებსა და KPI-ს შორის და რომლის გაზომვაა უფრო მნიშვნელოვანი
KPI (Key Performance Indicator) წარმოადგენს ბიზნეს-პროცესების ძირითადი ეფექტიანობის მაჩვენებელს. ანალიტიკის მაჩვენებლებისგან განსხვავება მარტივია – KPI მუდამ პროცენტებში გამოიხატება. KPI-ის მაგალითად შეიძლება მივიჩნიოთ, «თვეში მოზიდული ახალი კლიენტების რაოდენობა» (targeted new customers per month). ლოგიკურია, რომ ყველა კომპანიას ჰქონდეს საკუთარი ფიქსირებული KPI, რათა შეძლოს გაყიდვების განვითარების გაანალიზება. მის შესამუშავებლად, საჭიროა მუშაობა დავიწყოთ საფუძვლებიდან: გავიგოთ, რა არის ორგანიზაციის მიზნები (მაგალითად, რა მოცულობის გაყიდვების მიღწევა გვსურს და რა ვადაში), მათი მიღწევის გზები (სოციალურ ქსელებში რეკლამა, კონტექსტური რეკლამა თუ იმეილ მარკეტინგი) და ის, თუ კონკრეტულად ვინ იმუშავებს ამ მონაცემებზე.
განვიხილოთ შემდეგი სცენარი: თქვენ გაქვთ ონლაინ მაღაზია რომელიც მომხმრებელს სთავაზობს აქსესუარებს, ამ თვეში მოგების მისაღებად საჭიროა გარკვეული რაოდენობის პროდუქცია გაყიდოთ. თქვენ მიერ განსაზღვრული KPI არის 1000 ცალი სამაჯურის გაყიდვა. იქნება ეს კვირაში 250 სამაჯური თუ 1000 სამაჯური პირველ სამ დღეში — საბოლოო მიზანი 1000-იან ნიშნულზე გასვლაა. როდესაც თვის მეორე კვირა დადგება და უკვე გაყიდული გექნებათ 550 სამაჯური, შეგიძლიათ გადახედოთ თქვენს KPI-ს და შეამოწმოთ, სწორ გზაზე ხართ თუ არა. თუ დაინახავთ რომ გათვალისწინებულ გეგმას ჩამორჩებით — უნდა იფიქროთ, როგორ გააუმჯობესოთ შედეგი. ამაში კი ზუსტად ბიზნეს ანალიტიკის სხვადასხვა მაჩვენებლები დაგეხმარებიან.
Ecommerce ანალიტიკის მაჩვენებელი არის რიცხობრივი, რომლის დათვლაც შესაძლებელია. მაგალითად, ვებგვერდზე რეგისტრაციების ან სოციალურ ქსელში „ლაიქების“ რაოდენობა. ანალიტიკის მაჩვენებლები პირდაპირი ინდიკატორებია, რომლებიც საჭიროა როგორც ცალკეული სარეკლამო კამპანიების, ისე ზოგადად მარკეტინგული საქმიანობის შესაფასებლად. მათი საშუალებით შეგიძლიათ გაიგოთ, რამდენად შედეგიანია რეკლამა, რამდენი ახალი მომხმარებელი შეიძინა კომპანიამ კონკრეტულ პერიოდში, მყიდველთა რა პროცენტი ახორციელებს განმეორებით შესყიდვებს. მარკეტოლოგებსა და მეწარმეებს შეუძლიათ რეალურ დროში აკონტროლონ სარეკლამო კამპანიის მაჩვენებლები — კამპანიის გაშვების პროცესშივე. მაჩვენებლების საწყისი ანალიზის შედეგები გვეხმარება, რეკლამის პარამეტრების ოპტიმიზაციაში: ტრეფიკის შესაბამის გვერდებზე გადამისამართებაში, ბმულების ცვლილებაში და Call-To-Action-ის გაუმჯობესებაში, რათა მომხმარებელთა ყურადღება უფრო ეფექტურად მივიპყროთ.
ოპტიმალური მაჩვენებლების არჩევისას, ელექტრონულ კომერციაში უმთავრესად უნდა გაითვალისწინოთ ხარჯებთან დაკავშირებული ინდიკატორები, როგორიცაა მომხმარებლის მოზიდვის ღირებულება, მიღებული შემოსავალი და დაბრუნებული მომხმარებლების პროცენტი.
ამრიგად, როგორც KPI, ასევე ანალიტიკის მაჩვენებლები ერთნაირად მნიშვნელოვან როლს ასრულებს ელექტრონულ კომერციაში. KPI აფიქსირებს საბოლოო მიზნებსა და შედეგებს, მაშინ როცა მაჩვენებლები უზრუნველყოფს მონაცემებს ანალიზისთვის, სტრატეგიების ეფექტიანობის შესაფასებლად და საჭიროების შემთხვევაში მთელი სარეკლამო კამპანიის კურსის კორექტირებისთვის.
როგორ შევაფასოთ ელექტრონული კომერციის მაჩვენებლების ეფექტიანობა: პირველი ნაბიჯები
ონლაინ მაღაზიის მუშაობის, ანალიზისა და ოპტიმიზაციის გასაუმჯობესებლად საჭიროა რამდენიმე მარტივი ტექნიკური ნაბიჯის გადადგმა. თუ თქვენ უკვე გიმუშავიათ სარეკლამო პლატფორმების მართვის ინტერფეისებთან, ამ ნაბიჯების შესრულება დიდ სირთულეს არ წარმოადგენს. ხოლო თუ რაიმე სირთულეს წააწყდებით, სასურველია დახმარებისთვის ვებ-ანალიტიკოსს ან პროგრამისტს მიმართოთ.
საიტზე ანალიტიკის დაყენება. ამისათვის დაგჭირდებათ რომელიმე ვებ-ანალიტიკის სერვისი (მაგალითად: Google Analytics). რეგისტრაციის შემდეგ ჩააშენეთ შესაბამისი კოდი თქვენს საიტზე. ეს უზრუნველყოფს მომხმარებელთა ქცევის შესახებ ყველა საჭირო ინფორმაციის ავტომატურად შეგროვებას და შემდგომში ინფორმაციის დამუშავებას.
მიზნების განსაზღვრა. შეარჩიეთ რამდენიმე ძირითადი ეფექტიანობის მაჩვენებელი (მაგალითად, კონვერსია, საშუალო შეკვეთის ღირებულება, საიტზე გატარებული საშუალო დრო). ონლაინ-მაღაზიისთვის, როგორც წესი, მთავარი მიზნობრივი ქმედებებია: პროდუქტის კალათაში დამატება, კალათის ნახვა და შეკვეთის წარმატებით გაფორმება. თითოეული მიზნისთვის შესაბამისი მაჩვენებლების ნაკრები არსებობს. მაგალითად, თუ გაყიდვების სტიმულირებისთვის საიტზე პროდაქტების რეკომენდაციების სისტემა გააქტიურეთ, უნდა აკონტროლოთ შეკვეთების რაოდენობა და მათგან მიღებული შემოსავალი. თუ მომხმარებლებს პრომოკოდებს სთავაზობთ, დააკვირდით მათი გამოყენების სიხშირეს. Google Analytics მრავალფეროვან ინსტრუმენტებს გვთავაზობს მაჩვენებლების ასახვისა და ანალიზისთვის.
საიტის და კამპანიების ოპტიმიზაცია. მაჩვენებლების რეგულარული მონიტორინგი და ანალიზი დაგეხმარებათ ონლაინ-მაღაზიის ეფექტიანობის გაზრდაში და დასახული მიზნების მიღწევაში. სასარგებლოა, შექმნათ ინტეგრირებული ინდექსი, რომელიც ყველა მარკეტინგული არხის ეფექტურობას აერთიანებს და იმოქმედოთ ამ ერთიანი ინდექსის მიხედვით. მაგალითად, ელექტრონული კომერციის პროექტის მფლობელმა შეიძლება აირჩიოს ოთხი ძირითადი მაჩვენებელი და თითოეულისთვის შეიქმნას მიზნობრივი KPI. თუ ამ ოთხიდან ორი მაჩვენებელი გეგმიური მნიშვნელობის 90%-ზე სრულდება, ხოლო დანარჩენი ორი 100%-ს აღწევს, ასეთი ერთიანი ინდექსი 0.95-ს (95%-ს) გაუტოლდება.
რა სიხშირით უნდა შევამოწმოთ ანალიტიკის მაჩვენებლები
გამოკვლევების თანახმად, Ecommerce პროექტის მაჩვენებლების მონიტორინგი საჭიროა სხვადასხვა სიხშირით: ყოველდღიურად, ყოველკვირეულად, ორ კვირაში ერთხელ, ყოველთვიურად და კვარტლურად.
ყოველდღიურად: სასარგებლოა, მონიტორინგი გაუწიოთ ისეთი მაჩვენებლებს, როგორიცაა საიტის ტრაფიკი და ჩვენებების რაოდენობა, მომხმარებელთა ჩართულობის ინდიკატორები და კონვერსიების დინამიკა. ეს არ ნიშნავს, რომ ყოველდღე ღრმა ანალიზია საჭირო — თუ საქმე არ ეხება საყურადღებო მაჩვენებლებს (მაგალითად: საიტზე მუდმივად გაქვთ 404 შეცდომა), ყოველდღიურ რეჟიმში ზედაპირული დაკვირვებაც საკმარისია.
ყოველკვირეულად: თვალყური ადევნეთ პროექტის საერთო მონახულებების რაოდენობას, სოციალური ქსელების აქტივობას, მომხმარებელთა რეიტინგებსა და შეფასებებს (feedback).
ორ კვირაში ერთხელ: ყსაჭიროა შეაფასოთ ძირითადი სარეკლამო კამპანიები უფრო გლობალურად. ყურადღება გაამახვილეთ საკვანძო მაჩვენებლებზე, როგორებიცაა AOV (Average Order Value — საშუალო შეკვეთის ღირებულება), CPA (Cost Per Action — ერთ ქმედებაზე დანახარჯი) და CAR (Shopping Cart Abandonment Rate — მიტოვებული კალათების მაჩვენებელი).
ყოველთვიურად: თვეში ერთხელ მნიშვნელოვანია შემდეგი მაჩვენებლების გაანალიზება: CAC (Customer Acquisition Cost — მომხმარებლის მოზიდვის ღირებულება), ROI (Return on Investment — ინვესტიციის უკუგების მაჩვენებელი) და კომპანიის წმინდა მოგება. (დიდ და სტაბილურ კომპანიებში წმინდა მოგება ზოგჯერ ყოველკვარტალურადაც იზომება.) აგრეთვე, სასარგებლოა მიმოხილვებისა და გამოხმაურებების მონიტორინგი, რათა აღმოჩენილი ხარვეზების შემთხვევაში დროულად მოახდინოთ რეაგირება და მომსახურების გაუმჯობესებისთვის.
ყოველკვარტალურად: როგორც წესი, კვარტალში ერთხელ აფასებენ ისეთ მაჩვენებლებს, როგორიცაა LTV (Customer Lifetime Value — მომხმარებლის სიცოცხლის ღირებულება), რადგან ეს მონაცემი ყოველდღიურ ჭრილში დიდ მერყეობას არ განიცდის. დამატებით, შეიძლება დააკვირდეთ მომხმარებელთა შენარჩუნების დონეს და საშუალო ინტერვალს განმეორებით შესყიდვებს შორის.
როგორ უკავშირდება მაჩვენებლები მარკეტინგული ძაბრის ეტაპებს
არსებობს ძირითადი მაჩვენებლების ნაკრები, რომლებიც მნიშვნელოვანია ნებისმიერი ბიზნესისთვის. მოდით, დავყოთ ისინი ოთხ კატეგორიად — იმ ეტაპების მიხედვით, რასაც მომხმარებელი გადის ელექტრონული კომერციის მარკეტინგულ ძაბრში:
- მომხმარებელთა მოზიდვა
- ჩართულობა და შენარჩუნება
- გაყიდვები
- განმეორებითი შესყიდვები
ზოგიერთი მაჩვენებელი სასარგებლოა ყოველდღიური მონიტორინგისთვის, სხვები კი უფრო სტრატეგიული გადაწყვეტილებების მისაღებად გამოიყენება. განვიხილოთ თითოეული ეტაპი ცალ-ცალკე.
როგორ გავაანალიზოთ მომხმარებელთა ქცევა საიტზე
ამ კატეგორიის მეტრიკები აჩვენებს, რამდენად აინტერესებს მომხმარებელს თქვენი საიტი და რამდენად ღირებულია მისთვის იქ ყოფნა: რა დრო გაატარა თქვენს საიტზე, რამდენი გვერდი დაათვალიერა, მალევე გავიდა თუ არა საიტიდან.
Total Visits — საიტზე მომხმარებლების ვიზიტების რაოდენობას აჩვენებს, დროის კონკრეტულ პერიოდში. მნიშვნელოვანია ეს მაჩვენებელი სტაბილურად იზრდებოდეს — ეს ნიშნავს, რომ თქვენი რეკლამა შედეგიანია.
BR (Bounce Rate) — უარის მაჩვენებელი
გამოითვლება იმ მომხმარებლების პროცენტით, რომლებიც საიტზე შესვლისთანავე გავიდნენ, გვერდის ღრმა დათვალიერების გარეშე. თუ თქვენი საიტი საკმაოდ ინფორმაციულია, მაგრამ მომხმარებლები მხოლოდ მთავარ გვერდზე ჩერდებიან — ეს სიგნალია, რომ რეკლამა არ ასახავს საიტის შინაარსს. კარგი BR ითვლება 30–50%, ხოლო იდეალური — 25%-ზე ნაკლები.PPV (Pages Per Visit) და TSS (Time Spent on Site)
PPV აჩვენებს, რამდენ გვერდს ათვალიერებს მომხმარებელი თითოეულ ვიზიტზე, ხოლო TSS — საიტზე გატარებულ საშუალო დროს. კარგი მაჩვენებელად ითვლება 3–4 გვერდის ნახვა ერთ ვიზიტზე საშუალოდ და ~53 წამი თითო დაყოვნება.
როგორ გავაანალიზოთ ახალი მომხმრებლები მობილურ აპლიკაციაში
მარკეტინგული სტრატეგიის ეფექტიანობის გასაანალიზებლად მნიშვნელოვანია შემდეგი ძირითადი მაჩვენებლები:
CAC (Customer Acquisition Cost) — ახალი მომხმარებლის მოზიდვის ღირებულება
აჩვენებს, რა თანხა დაიხარჯა თითო „მომგებიან“ მომხმარებელზე (ანუ იმაზე, ვინც შეიძინა). ფორმულა: კამპანიის ბიუჯეტი / გაყიდვების რაოდენობა.CPI (Cost Per Install) — აპლიკაციის ინსტალაციის ღირებულება
ასახავს რეკლამაზე გაწეულ ხარჯებს ინსტალაციის რაოდენობასთან მიმართებით. რაც უფრო ნაკლებია CPI მით უკეთესია.RPI (Revenue Per Install) — შემოსავალი თითო ინსტალაციაზე
ფორმულა: კამპანიის შემოსავალი / ინსტალაციების რაოდენობაზე. თუ RPI ნაკლებია CPI-ზე — საჭიროა სტრატეგიის გადახედვა.CTR (Click-to-Install Rate) — კლიკიდან ინსტალაციამდე გარდაქმნის მაჩვენებელი. CTR გამოითვლება წარმატებული ინსტალაციების რაოდენობის გაყოფით დაკლიკების საერთო რაოდენობაზე. შედეგი მრავლდება 100-ზე, რათა მიიღოთ შედეგი პროცენტულად. ინდუსტრიაში საშუალო CTR 1%-დან 4%-მდე მერყეობს.
ჩართულობისა და შენარჩუნების მაჩვენებლები
CR (Conversion Rate) — კონვერსია
აჩვენებს იმ მომხმარებლების პროცენტულ რაოდენობას, რომლებმაც შეასრულეს სამიზნე მოქმედება ვებსაიტზე ან აპლიკაციაში. მაგალითად, მათ შეიძინეს პროდუქტი, შეავსეს ფორმა ან გამოიწერეს სიახლეები. CR-ის გამოსათვლელად, თქვენ უნდა გაყოთ მოქმედების შესრულების რაოდენობა / ყველა ვიზიტორზე × 100%. შედეგი: თუ 100 ვიზიტორიდან მხოლოდ 10-მა გააკეთა შეკვეთა, მაშინ კონვერსია 10% იქნება.
რეკომენდაცია: თუ გაქვთ მრავალფეროვანი პროდუქცია, გამოთვალეთ კონვერსია ცალკე თითოეული კატეგორიისთვის — ამით უკეთ დაინახავთ პრობლემა რომელი მიმარტულებით გაქვთ.
CAR (Cart Abandonment Rate) — მიტოვებული კალათების მაჩვენებელი
აჩვენებს იმ მომხმარებლების პროცენტულ რაოდენობას, რომლებმაც დაამატეს პროდუქტი კალათაში, მაგრამ არ განათავსეს შეკვეთა. მათი უმეტესობა რეალურად მზად იყო პროდუქტის შესაძენად, მაგრამ ბოლო მომენტში ყურადღება გადაიტანეს ან გადაიფიქრეს. როგორც წესი, პროდუქტის მიტოვება უფრო ხშირად ხდება მობილურ მოწყობილობებზე, ვიდრე დესკტოპ კომპიუტერებზე. ეს იმიტომ ხდება, რომ პატარა ტელეფონის ეკრანზე უფრო რთულია პროდუქტის ყველა დეტალის დათვალიერება ან შეკვეთის განსათავსებლად საჭირო მონაცემების შეყვანა, განსაკუთრებით თუ ფორმა არ გვთავაზობს ავტომატურ შევსებას. თუ მაღალი CAR გაქვთ, პირველ რიგში ეს ფაქტორები უნდა შეამოწმოთ. ამ მაჩვენებლის შესამცირებლად, მომხმარებლებს, როგორც წესი, „დავიწყებული“ პროდუქტების შესახებ push-შეტყობინებების ან ელექტრონული ფოსტის საშუალებით ახსენებენ თავს კომპანიები. საშუალოდ, კალათის მიტოვების გლობალური მაჩვენებელი ყოველთვის მაღალია – დაახლოებით 70%-ია.
გაყიდვების ეფექტიანობის შეფასება
AOV (Average Order Value) — საშუალო შეკვეთის ღირებულება.
ფორმულა: ჯამური შემოსავალი / შეკვეთების რაოდენობა. AOV დაგეხმარებათ უკეთ დააგეგმოთ მარკეტინგი და პროდუქტების ფასის პოლიტიკა.CRR (Customer Retention Rate) — მომხმარებელთა შენარჩუნების მაჩვენებელი
აჩვენებს ოპერაციულ ხარჯებს შემოსავლთან მიმართებაში. ფორმულა: მარკეტინგის ხარჯები / შემოსავალი. რაც ნაკლები CRR — მით უკეთ გამოიყენებთ ბიუჯეტს. თუ ამ ფორმულაში ცვლადები გადაატრიალებთ — მიიღებთ ROAS-ს (Return on Ad Spend), რომლის იდეალური მაჩვენებელი >100% უნდა იყოს.
განმეორებითი გაყიდვების მაჩვენებლები
LTV (Customer Lifetime Value) — მომხმარებლის სიცოცხლის ღირებულება
განსაზღვრავს, რამდენ თანხას ხარჯავს ერთგული კლიენტი თქვენს მაღაზიაში მთლიანი ცხოვრების განმავლობაში. მარტივი გამოთვლა: საშუალო შეკვეთის ღირებულება × საშუალო შეკვეთების რაოდენობა × შენარჩუნების პერიოდი.
რჩევა: გამოთვალეთ LTV ცალკე მაღალი და დაბალი ფასის პროდუქციის მომხმარებლებისთვის. შედარება CAC-თან უნდა აჩვენებდეს მინ. 3:1 ან 4:1 კოეფიციენტს.
Churn — კლიენტების დაკარგვის მაჩვენებელი.
პროცენტული მაჩვენებელი იმ მომხმარებლებისა, ვინც გააკეთა მხოლოდ ერთი შენაძენი და აღარ დაბრუნდა. მაღალი Churn — ნიშნავს დაბალ LTV-ს. განმეორებითი მყიდველები ყოველთვის იაფია, ვიდრე ახლის მოზიდვა. იმუშავეთ Retention-ზე!
ჩეკლისტი: 10 მთავარი მაჩვენებელი, რომელთა მონიტორინგიც საჭიროა Ecommerce პროექტისთვის
სარეკლამო კამპანიების ეფექტიანობის მთავარ მაჩვენებელს, საბოლოო ჯამში წარმოადგენს ის შემოსავალი, რომელიც კომპანიამ მარკეტინგული აქტივობების შედეგად მიიღო. ამ მონაცემის გამოთვლა ROI-ის (Return on Investment — ინვესტიციის უკუგების) საშუალებითაა შესაძლებელი. თუმცა, რეკლამაზე ინვესტიციის ამონაგების გარდა, მოდით შევაჯამოთ ელექტრონული კომერციის 10 ძირითადი მაჩვენებელი, რომელთა მონიტორინგი Ecommerce პროექტისთვის მნიშვნელოვანია:
1. CAC (Customer Acquisition Cost) — ახალი მომხმარებლის მოზიდვის ღირებულება
წარმატებული კომპანიები ყოველთვის ცდილობენ მომხმარებლის მოზიდვის ხარჯების შემცირებას. ახალი კლიენტის მოზიდვის მაღალი ფასი (განსაკუთრებით, თუ საშუალო შეკვეთის ღირებულებაც დაბალია) მიუთითებს, რომ თქვენი მარკეტინგისა და მომსახურების ეფექტიანობა არასაკმარისია.
2. CTR (Click-Through Rate) — რეკლამაზე დაკლიკების მაჩვენებელი (პროცენტი)
CTR აჩვენებს, მომხმრებლების რა პროცენტმა დააკლიკა რეკლამას. ეს კონტექსტური რეკლამის დაწყებისას ერთ-ერთი ძირითადი მაჩვენებელია, რომელსაც ყურადღება უნდა მიაქციოთ.
3. CR (Conversion Rate) — კონვერსიის მაჩვენებელი
ასახავს იმ მომხმარებლების პროცენტულ წილს, რომლებმაც შეასრულეს თქვენთვის სასურველი სამიზნე მოქმედება (მაგალითად: პროდუქტის შეძენა, ფორმის შევსება ან APP-ის ჩამოტვირთვა). კონვერსია ინტერნეტ-მარკეტინგში ეფექტიანობის ერთ-ერთი ძირითადი ინდიკატორია.
4. CAR (Shopping Cart Abandonment Rate) — მიტოვებული კალათის მაჩვენებელი
მიუთითებს იმ მომხმარებლების პროცენტზე, რომლებმაც დაამატეს პროდუქტი კალათაში, მაგრამ საბოლოოდ შეძენა არ დაასრულეს. ასეთი შემთხვევები ხდება, როდესაც მომხმარებელი ყიდვის პროცესში სხვა საქმეზე გადაერთო, პროდუქტი იპოვა უკეთეს ფასად ან გადაწყვეტილება ხელფასის მიღებამდე გადადო.
5. AOV (Average Order Value) — საშუალო შეკვეთის ღირებულება
ვთქვათ, საბავშვო პროდუქციის ონლაინ-მაღაზიამ 20 პროდუქტი გაყიდა ჯამში 300 000 ლარად. შესაბამისად, საშუალო შეკვეთის ღირებულება იქნება: 300 000 ლარი / 20 პროდუქტზე = 15 000 ლარი.
6. CRR (Customer Retention Rate) — მომხმარებელთა შენარჩუნების მაჩვენებელი
არსებულ მომხმარებელზე პროდუქტის გაყიდვა ბევრად ადვილია, ვიდრე ახლის მოზიდვა. CRR გვაჩვენებს, როგორ იქცევიან მომხმარებლები საიტზე: ყიდულობენ ერთხელ და აღარ ბრუნდებიან თუ გარკვეული დროის შემდეგ ისევ კეთილგანწყობილები არიან თქვენი პროდუქციის მიმართ და უბრუნდებიან შესყიდვებს. კარგი CRR მაქსიმალურად უნდა მიუახლოვდეს 100%-ს. თუ ეს მაჩვენებელი იკლებს, უნდა გაანალიზოთ, რა შეიცვალა თქვენი მომხმარებლების მომსახურებაში ან შეთავაზებაში.
7. LTV (Customer Lifetime Value) — მომხმარებლის სიცოცხლის ღირებულება
გულისხმობს იმ საერთო მოგებას, რომელსაც ერთი მომხმარებელი კომპანიას უწყვეტი ურთიერთობის პერიოდში აძლევს (ანუ თავისი „ცხოვრების ციკლის“ განმავლობაში ყველა შენაძენიდან მიღებული ჯამური მოგება). სწორად გაანგარიშებული LTV მარკეტერებს მნიშვნელოვანი გადაწყვეტილებების მიღების მყარ საფუძველს აძლევს და ეხმარება კომპანიას სარეკლამო ხარჯების მაქსიმალურად ეფექტურად განაწილებაში.
8. Churn — მომხმარებელთა დაკარგვის მაჩვენებელი
ეს ინდიკატორი აჩვენებს, მომხმარებელთა რა პროცენტმა შეწყვიტა თქვენი პროდუქტის ან სერვისის გამოყენება მოცემულ პერიოდში. მაგალითად, თუ თებერვალში გყავდათ 10 000 აქტიური მომხმარებელი და მათგან 1 000-მა შეწყვიტა თქვენი პროდუქტის ან სერვისით სარგებლობა, თქვენი ყოველთვიური Churn იქნება დაახლოებით 10%.
9. CPI (Cost Per Install) — ერთი ინსტალაციის ღირებულება
აღნიშნული მაჩვენებელი გვიჩვენებს, რამდენი თანხის დახარჯვაა საჭირო ერთი აპლიკაციის ინსტალაციის მისაღებად სარეკლამო კამპანიიდან. CPI ძალიან მნიშვნელოვანი მაჩვენებელია აპლიკაციის შემქმნელებისთვის, რადგან ის ეხმარება შეფასდეს სარეკლამო კამპანიის ეფექტიანობა და სხვადასხვა წყაროდან მიღებული ტრაფიკის შედარება. დაბალი CPI მიუთითებს, რომ კამპანია ეფექტიანია, რადგან ნაკლები ხარჯით იღებთ ბევრ ინსტალაციას. CPI-ის შესამცირებლად საჭიროა აპლიკაციის ხარისხის გაუმჯობესება, რათა მომხმარებლისთვის უფრო მიმზიდველი გახდეს.
10. GMV (Gross Merchandise Value) — გაყიდული საქონლის მთლიანი ღირებულება
ეს არის განსაზღვრულ პერიოდში სავაჭრო პლატფორმაზე გაყიდული ყველა პროდუქტის საერთო ღირებულება, რომელიც არ მოიცავს დაბრუნებულ, გადაცვლილ ან ფასდაკლებით გაყიდულ ერთეულებს. აღნიშნული ბიზნეს-მაჩვენებელი განსაკუთრებით გავრცელებულია ელექტრონული კომერციის სფეროში — GMV ასახავს პლატფორმის საერთო აქტივობას. რაც უფრო მაღალია ეს მაჩვენებელი, მით უფრო მაღალი უნდა იყოს პლატფორმის საკომისიო შემოსავალი (გაყიდვებიდან მიღებული საკომისიოების ოდენობა).
ძალიან გამართული და პრაქტიკული სტატიაა. ყველა მთავარი მაჩვენებელი ერთად არის თავმოყრილი, ასევე გასაგებად და პროფესიონალურად ახსნილი. რეკომენდაციას ვუწევ!